skender hita

30 Mars 2026

Skënder Hita, i cili deri tani ka mbajtur postin e Drejtorit të Policisë Fier  do të jetë drejtuesi i ri i Policisë së Shtetit. Lajmin e ka bërë të ditur ministri i Brendshëm,  Besfort Lamallari, i cili me anë të një postimi në Facebook thotë se ky vendim është marrë mbi bazën e meritës, profesionalizmit dhe integritetit, pas një procesi konkurrues ku Hita është renditur ndër kandidatët më të vlerësuar.

Ministri theksoi se drejtori i ri ka dëshmuar përvojë të spikatur, vizion të qartë strategjik dhe angazhim të qëndrueshëm ndaj ligjit dhe qytetarëve.

“Policia e Shtetit ka një rol kyç në garantimin e rendit dhe sigurisë publike. Drejtimi i saj kërkon jo vetëm aftësi profesionale, por edhe ndershmëri, etikë dhe përgjegjësi të lartë publike,” u shpreh Lamallari.

Ai shtoi se pret që, nën drejtimin e Hitës, institucioni të vijojë të përmirësojë performancën, të rrisë besimin e qytetarëve dhe të përmbushë me përkushtim misionin në shërbim të sigurisë dhe shtetit të së drejtës.

Njoftimi i ministrit

Sot në mbledhjen e Këshillit të Ministrave miratuam vendimin për dhënien e gradës Drejtues Madhor dhe emërimin e Drejtorit të Përgjithshëm të Policisë së Shtetit, z.Skënder Hita. Ky është një vendim i bazuar në meritë, profesionalizëm dhe integritet.

Skënder Hita ka rezultuar ndër kandidatët më të vlerësuar nga një proces konkurrues, duke dëshmuar përvojë të spikatur, vizion të qartë strategjik dhe angazhim të palëkundur ndaj ligjit dhe qytetarëve.

Policia e Shtetit ka një rol kyç në garantimin e rendit dhe sigurisë publike. Prandaj, drejtimi i saj kërkon jo vetëm aftësi profesionale, por edhe ndershmëri, etikë dhe përgjegjësi të lartë publike.

Jam i bindur se, nën drejtimin e tij, Policia e Shtetit do të vijojë të forcojë performancën, të rrisë besimin e qytetarëve dhe të përmbushë me përkushtim misionin e saj në shërbim të sigurisë dhe shtetit të së drejtës.